रसुवा बाढीमा मृत्यु हुनेको संख्या १ हजार ३४४ पुग्यो

काठमाडौं । रसुवाको भोटेकोशी नदीमा आएको विनाशकारी बाढीमा परी ज्यान गुमाउनेको संख्या १ हजार ३४४ पुगेको छ। नेपाल प्रहरीले शनिबार बिहान सार्वजनिक गरेको पछिल्लो खोज तथा उद्धार विवरणअनुसार अहिलेसम्म उक्त संख्यामा शव फेला परेको हो।

प्रहरीका अनुसार शनिबार बिहान ५ बजेसम्म संकलन गरिएको तथ्यांकमा ५२ बालक, ३३ बालिका, २६९ महिला र ४८९ पुरुषको शव फेला परेको छ। त्यस्तै, बाढीका कारण आंशिक अंग मात्र फेला परेका ५०१ जनाको विवरणसमेत प्रहरीले सार्वजनिक गरेको छ।

• 

बाढीपछि अझै ठूलो संख्यामा मानिस सम्पर्कविहीन छन्। प्रहरीको पछिल्लो विवरणअनुसार ४ हजार ८९८ जना बेपत्ता रहेका छन्।

उद्धार अभियानलाई तीव्रता दिँदै सुरक्षाकर्मीले हालसम्म ८ हजार ६३१ जना बाढी प्रभावितको उद्धार गरिसकेका छन्। बाढीमा परी २५ जना प्रहरीसमेत सम्पर्कविहीन रहेको र ६५ जना प्रहरी कर्मचारी प्रभावित भएको प्रहरीले जनाएको छ।

खोजी, उद्धार तथा राहत कार्यलाई प्रभावकारी बनाउन सुरक्षा निकायसहित ७ हजार ९१२ जनालाई परिचालन गरिएको छ। बाढी प्रभावित क्षेत्रमा बेपत्ताको खोजी तथा उद्धार कार्य अझै जारी रहेको प्रहरीले जनाएको छ।