×

माउन्टेन फ्लाइट फेरि सुरु हुने, यतीको उडान हरेक आइतवार

अशोज ६, २०७८ | दाक्सु मिडिया सम्वाददाता

काठमाडौं । दोस्रो लकडाउनपछि रोकिएको पर्वतीय उडान अर्थात् माउन्टेन फ्लाइट फेरि सुरु हुने भएको छ । बुद्ध एअरले आउँदो शनिवारदेखि हरेक शनिवार र यती एअरलाइन्सले १० गते आइतवारदेखि हरेक आइतवार उडान गर्ने जनाएको छ ।

मौसममा केही सुधार हुने सङ्केत देखिएको र पर्वतीय उडानका लागि सेप्टेम्बर र मार्च महिना उपयुक्त मानिने भएकाले उडान सुरु गर्न लागिएको यती एअरलाइन्सका प्रवक्ता सुदर्शन बर्तौलाले जानकारी दिनुभयो ।

हरेक आइतवारका लागि एटीआर विमानमार्फत एउटा उडान हुने गरी तालिका तय गरिएको र यात्रुहरूको मागअनुसार बिस्तारै उडान सङ्ख्या थप गर्दै जाने नीति लिएको प्रवक्ता बर्तौलाले बताउनुभयो ।

अहिलेका लागि यतीले नेपाली तथा भारतीय नागरिकका लागि सगरमाथाको उचाइ बराबरको आठ हजार आठ सय ४८ र आकर्षक भाडादरमा पर्वतीय उडानको टिकट खरिद गर्न पाइने जनाएको छ । आवासीय विदेशी नागरिकका लागि भने १३ हजार दुई सय ७५ भाडा दर कायम गरिएको बर्तौलाले जानकारी दिनुभयो ।

यतीले दुई वटा टिकटका लागि क्रमशः नौ हजार आठ सय ४८ र विदेशीका लागि १४ हजार सात सय ७५ रुपैयाँ भाडा दर तोकेको छ । यो टिकट खरिद गर्दा भने यात्रुहरूले एउटा झ्याल भएको र अर्कोसँगैको झ्याल नभएको सिट प्राप्त गर्नेछ्न् ।

बुद्ध एअरले भने १० हजार रुपैयाँमा दुई वटा टिकटको व्यवस्था गरेको छ ।

फेसबुकबाट तपाईको प्रतिक्रिया

%d bloggers like this: