महालक्ष्मी विकास बैंकको सन्तुलित वित्तीय प्रगति, लाभांश वितरण क्षमतामा उल्लेखनीय वृद्धि

काठमाडौं । महालक्ष्मी विकास बैंकले आर्थिक वर्ष २०८१/८२ को चौथो त्रैमाससम्ममा आफ्नो समग्र वित्तीय सूचकहरूमा उल्लेखनीय सुधार गर्दै सन्तुलित वित्तीय विवरण सार्वजनिक गरेको छ। पछिल्लो विवरणअनुसार, बैंकको खुद नाफा ५० करोड रुपैयाँ नाघेको छ भने लाभांश वितरण क्षमतामा समेत उल्लेखनीय वृद्धि देखिएको छ।

बैंकले हालै सार्वजनिक गरेको अपरिष्कृत वित्तीय विवरण अनुसार, आर्थिक वर्षको अन्त्यसम्म बैंकले रु. ५६.२२ अर्ब निक्षेप संकलन गर्दै रु. ४५.८५ अर्ब कर्जा परिचालन गरेको छ। यो कर्जा परिचालन अघिल्लो वर्षको तुलनामा ५.०५ प्रतिशतले वृद्धि भएको हो।

प्रमुख वित्तीय सूचकहरू सकारात्मक:

खुद नाफा: रु. ५०.०३ करोड

लाभांश वितरण क्षमता: ११.५१%

कर्जा-निक्षेप अनुपात (CD Ratio): ८३.९८%

खराब कर्जा अनुपात (NPL): ४.८६% (राष्ट्र बैंकको सीमा भित्र)

शेयरधनी कोषमा प्रतिफल: ११.७९%

पुँजी पर्याप्तता अनुपात (Capital Adequacy Ratio): पर्याप्त

कोष लागत: ४.५६% (गत वर्षको तुलनामा २.४७% ले कम)

आधार दर (Base Rate): ६.५४%

बैंकका अनुसार कोष लागतमा आएको गिरावटले आधार दरमा पनि सकारात्मक असर पारेको छ, जसका कारण ऋणीहरूले भविष्यमा सस्तो ब्याजदरमा कर्जा लिन सक्नेछन्।

डिजिटल प्रविधिमा विस्तार:

बैंकले हालै आफ्नो मोबाइल बैंकिङ एप “महालक्ष्मी स्मार्ट साथी” मा भर्चुअल क्रेडिट कार्ड सुविधा थप गरेर डिजिटल सेवा विस्तारमा पनि कदम चालेको छ। यस सुविधाले ग्राहकलाई थप सहज, सुरक्षित र आधुनिक सेवा प्रदान गर्ने विश्वास बैंकले व्यक्त गरेको छ।

सबल बैंक, सफल सहकार्य:

“सबल बैंक, सफल सहकार्य” भन्ने नारासहित बैंकले देशभर १०३ शाखा कार्यालयहरुमार्फत ८ लाखभन्दा बढी ग्राहकहरूलाई गुणस्तरीय वित्तीय सेवा प्रदान गरिरहेको छ।

महालक्ष्मी विकास बैंकको पछिल्लो वित्तीय प्रगति र सेवा विस्तारले बैंकको दीर्घकालीन स्थायित्व, लाभांश क्षमतामा सुधार, तथा ग्राहक सन्तुष्टिमा उल्लेखनीय योगदान पुर्‍याउने विश्वास गरिएको छ।