मनसुनको प्रभाव : यी क्षेत्रमा आज वर्षाको सम्भावना

काठमाडौं । मनसुन सक्रिय रहेकाले आइतबार पनि देशका अधिकांश भागको मौसम बदली रहने भएको छ। मौसम पूर्वानुमान महाशाखाका अनुसार कोशी, बागमती, गण्डकी, लुम्बिनी, कर्णाली र सुदूरपश्चिमका केही क्षेत्रमा अहिले नै हल्का तथा मध्यम वर्षा भइरहेको छ।

दिउँसो हिमाल र पहाडका धेरै स्थानमा मेघगर्जन र चट्याङसहित वर्षा हुन सक्ने अनुमान गरिएको छ। तराईका विभिन्न भूभागमा पनि वर्षाको सम्भावना रहेको महाशाखाले जनाएको छ। विशेषगरी लुम्बिनी र सुदूरपश्चिमका धेरै तराई क्षेत्रमा पानी पर्ने सम्भावना छ भने कोशी, बागमती, गण्डकी र मधेसका केही स्थानमा समेत वर्षा हुनसक्नेछ।

• 

रातिको समयमा पनि वर्षाको सम्भावना कायमै रहनेछ। कोशी, बागमती र गण्डकीका केही हिमाली तथा पहाडी क्षेत्रमा चट्याङसहित मध्यम वर्षा हुन सक्नेछ। लुम्बिनी, कर्णाली र सुदूरपश्चिमका हिमाली तथा पहाडी भूभागमा समेत वर्षा हुने सम्भावना रहेको महाशाखाले जनाएको छ।

मनसुनको न्यून चापीय रेखा औसत स्थानभन्दा उत्तरतर्फ रहेकाले देशका विभिन्न क्षेत्रमा यसको प्रभाव देखिएको हो।