बिटुमिन अभावले अरनिको सडक विस्तार सुस्त

काभ्रे, असार ४ — अरनिको राजमार्गअन्तर्गत धुलिखेल–खावा सडकखण्डको स्तरोन्नति कार्य कच्चा पदार्थ ‘बिटुमिन’को अभावका कारण करिब दुई महिनादेखि प्रभावित बनेको छ।

सडकको पहिलो चरणको कालोपत्रे सम्पन्न भए पनि बाँकी भागको पक्कीकरण र अन्तिम ‘अस्फाल्ट’ तह हाल्ने काम रोकिएको सडक डिभिजन कार्यालय भक्तपुरले जनाएको छ। आवश्यक सामग्री आयात भएपछि बाँकी डेढ किलोमिटर सडकमा दोस्रो चरणको काम अघि बढाइने बताइएको छ।

• 

चार किलोमिटर सडक स्तरोन्नतिको जिम्मा पाएको निर्माण कम्पनीसँग पुसभित्र काम सम्पन्न गर्ने लक्ष्य राखिएको छ। हाल यात्रुलाई सहज बनाउन खाल्डाखुल्डी पुर्ने र मर्मतका काम जारी रहेका छन्।