मेयर शाह अनुपस्थित भएपछि काठमाडौं महानगरको नगरसभा बैठक स्थगित

काठमाडौँ : मेयर बालेन्द्र शाह उपस्थित नभएपछि शुक्रबार बोलाइएको काठमाडौं महानगरपालिकाको पाँचौँ नगरसभा बैठक स्थगित भएको छ । आज बिहान ८ बजे बोलाइएको नगर सभाको बैठकमा मेयर शाह साढे ११ बजेसम्म पनि सभामा उपस्थित नभएपछि बैठक स्थगित गरिएको हो ।

सभामा आर्थिक वर्ष २०८१/८२ को बजेटमाथि छलफल गरी संशोधन प्रस्ताव पारित गर्ने कार्यक्रम रहेको महानगरपालिकाका प्रवक्ता नवीन मानन्धरले बताए । ‘हामीले बजेटमाथि संशोधन प्रस्ताव दर्ता गराएका थियौं,’ उनले भने, ‘साढे ११ बजेसम्म पर्खिँदा पनि मेयर साप आउनु भएन ।’

• 

• 

बजेट संशोधनमाथि आवश्यक तयारी पनि नपुगेकाले पनि आजको सभा हुन नसकेको उनले बताए । मेयर शाहले भने एमाले र कांग्रेसकै कारण नगरसभा रोकिएको जनाएका छन् । मेयर शाहले फेसबुकमा लेखेका छन्, ‘एमाले कांग्रेसले बीपी कोइराला, मदन भण्डारीको नाममा करोडौँको कार्यक्रम गरौँ भन्नुभयो । मैले चार स्वतन्त्र सेनानी सहीदहरू शुक्रराज शास्त्री, धर्मभक्त माथेमा, दशरथ चन्द, गङ्गालाल श्रेष्ठको नाममा गरौँ भनेँ । सायद कांग्रेस एमालेलाई नेपालको क्रान्तिमा उहाँहरूभन्दा धेरै कांग्रेस एमालेको नेताहरूको योगदान धेरै देख्नुभयो होला । त्यसपछि आज बस्ने नगरसभा बैठक रोकेर जानुभयो ।’