रुकुम पश्चिममा जिप दुर्घटना: चालकसहित २ जनाको मृत्यु, ९ घाइते

सुर्खेत,।रूकुम पश्मिमकाे सानीभेरी गाउँपालिका–६ देउताखोला (डाङडुङ्गे) मा आइतबार बिहान जिप दुर्घटना हुँदा दुई जनाको घटनास्थलमै मृत्यु भएको छ भने अन्य नौ जना घाइते भएका छन्।

कोटगाउँबाट गाउँपालिकाको केन्द्र सानीभेरी–९ सिम्ली हुँदै जिल्ला सदरमुकाम खलंगातर्फ आउँदै गरेको लु १ च ६०२९ नम्बरको डबल क्याप जिप आइतबार बिहान सवा ८ बजेतिर अनियन्त्रित भई सडकबाट झन्डै १०० मिटर तल खसेको हो।

जिल्ला प्रहरी कार्यालय रुकुम पश्चिमका प्रमुख, प्रहरी नायब उपरीक्षक (डीएसपी) वेदबहादुर पौडेलका अनुसार मृतकमध्ये एक जना जिप चालक र अर्की एक जना महिला रहेका छन्। मृतकहरूको पूर्ण पहिचान (सनाखत) हुन बाँकी रहेको प्रहरीले जनाएको छ।

• 

दुर्घटनामा परी जिपका साहु एवं स्थानीय वडा सदस्य बलबहादुर पुनसहित नौ जना घाइते भएका छन्। घाइतेहरूमध्ये चार जनाको अवस्था गम्भीर रहेको छ भने अन्य पाँच जनाको अवस्था मध्यम छ।

उद्धार तथा उपचारको पहल
घटनालगत्तै स्थानीय बासिन्दा र इलाका प्रहरी कार्यालय सिम्लीको टोली उद्धारमा खटिएको छ। जिल्ला प्रहरी प्रमुख पौडेल र प्रहरी प्रवक्ता हेमन्त गिरीको नेतृत्वमा थप प्रहरी टोली पनि घटनास्थल पुगिसकेको छ।

लिकाको खर्च बेहोर्ने गरी हेलिकप्टरको व्यवस्था गरिदिन गाउँपालिका र जिल्ला प्रशासन कार्यालयले गृह मन्त्रालयलाई पत्राचार गरिसकेको रुकुम पश्चिमका प्रमुख जिल्ला अधिकारी (प्रजिअ) निशान्तराज गौतमले जानकारी दिनुभएको छ। दुर्घटनाको कारणबारे प्रहरीले अनुसन्धान सुरु गरेको छ।