सीसी क्यामेराको घेरामा भरतपुर, ६२२ क्यामेराबाट निगरानी

चितवन । सडक दुर्घटना, ट्राफिक नियम उल्लङ्घन र आपराधिक गतिविधि नियन्त्रण गर्ने उद्देश्यले भरतपुर महानगरपालिकाका मुख्य सडक तथा बजार क्षेत्रमा सीसी क्यामेराको निगरानी विस्तार गरिएको छ।

महानगरपालिका र जिल्ला प्रहरी कार्यालय चितवनको सहकार्यमा ४१८ नयाँ क्यामेरा जडान गरिएका छन्। यसअघि जडान भएका २०४ क्यामेरासमेत समेट्दा कुल सङ्ख्या ६२२ पुग्नेछ।

• 

• 

प्रहरी कार्यालयमा एकीकृत कन्ट्रोल रुम स्थापना गरी निगरानी सुरु गरिएको छ। राजमार्गका विभिन्न स्थानमा गति मापन र सवारी नम्बर प्लेट पहिचान गर्ने प्रविधिसमेत जडान गरिएको छ।

क्यामेरा जडानका लागि महानगरपालिकाले पाँच करोड ५८ लाख रुपैयाँभन्दा बढी खर्च गरेको छ। यसबाट दुर्घटनाको विवरण पहिचान गर्न र शान्तिसुरक्षा कायम गर्न सहज हुने अपेक्षा गरिएको छ।