नवलपरासी पूर्वमा बस दुर्घटना, ५ जनाको मृत्यु

काठमाडौं । नवलपरासी पूर्वको विनयी त्रिवेणी गाउँपालिका–२ स्थित पूर्वपश्चिम राजमार्गमा बस दुर्घटना हुँदा पाँच जनाको मृत्यु भएको छ।

नेपालगञ्जबाट काठमाडौं आउँदै गरेको प्रदेश ३–०१–००६ ख १५५३ नम्बरको बस एस मोडबाट नालामा खसेको हो। दुर्घटनामा ११ जना घाइते भएका छन् भने एक जनाको अवस्था गम्भीर रहेको छ।

• 

बसमा चालकसहित १८ जना यात्रु रहेको प्रारम्भिक विवरण छ। गम्भीर घाइतेलाई भरतपुर र अन्यलाई डण्डास्थित स्वास्थ्य संस्थामा उपचारका लागि लगिएको छ। मृतकको पहिचान खुल्न बाँकी रहेको प्रहरीले जनाएको छ।