बलुचिस्तानमा सुरक्षा कारबाही तीव्र, क्वेटा र नुस्कीमा भिडन्त

काठमाडौँ । पाकिस्तानको बलुचिस्तानमा सुरक्षा बलले सशस्त्र समूहविरुद्ध कारबाही तीव्र पारेको छ। पछिल्लो दुई दिन क्वेटा र नुस्कीमा भएका छुट्टाछुट्टै अभियानमा १६ जना मारिएको पाकिस्तानी सेनाले जनाएको छ।

क्वेटाको शाबान क्षेत्रमा गरिएको कारबाहीमा पाँच जना मारिएका थिए। सुरक्षा बलले त्यहाँ रहेका आश्रयस्थलमा कारबाही गर्दा हतियार, गोलीगठ्ठा र विस्फोटक पदार्थसमेत बरामद गरेको दाबी गरेको छ।

नुस्की जिल्लामा भने गोप्य सूचनाका आधारमा अर्को अभियान सञ्चालन गरिएको थियो। त्यसक्रममा सुरक्षा बल र सशस्त्र समूहबीच भएको भिडन्तमा ११ जना मारिएको सेनाको भनाइ छ।

• 

पाकिस्तानी सेनाका अनुसार सेप्टेम्बर २१ यता बलुचिस्तानमा भएका यस्ता कारबाहीमा मारिनेको संख्या ३३ पुगेको छ। सेनाले अभियानलाई निरन्तरता दिने जनाएको छ।