२५ म्यानपावर कम्पनीसँग पाँच वर्षको वित्तीय विवरण माग

काठमाडौं । वैदेशिक रोजगार विभागले मलेसियाको एफडब्लूसीएमएसमा मुख्य कम्पनीका रूपमा रहेका २५ म्यानपावर कम्पनीसँग पछिल्ला पाँच आर्थिक वर्षको व्यावसायिक तथा वित्तीय विवरण माग गरेको छ।

विभागले आव २०७८/७९ देखि २०८२/८३ सम्मको आर्थिक कारोबार, श्रमिक पठाएको विवरण, सेवा शुल्क, एजेन्ट तथा प्रतिनिधिलाई गरिएको भुक्तानी, कर विवरण, लेखापरीक्षण प्रतिवेदनलगायत कागजात १५ दिनभित्र बुझाउन निर्देशन दिएको हो।

• 

मलेसियामा नेपाली श्रमिक पठाउँदा २५ म्यानपावरलाई मुख्य कम्पनी र २५० लाई सबएजेन्ट बनाइएको विषय विवादित बनेपछि विभागले सम्बन्धित कम्पनीसँग एफडब्लूसीएमएसमा उनीहरूको संलग्नता र प्रक्रियाबारे स्पष्टीकरणसमेत मागेको छ।

विभागका महानिर्देशक नवराज ढकालका अनुसार २५ कम्पनीसँग विवरण माग गरेर अनुसन्धान रोकिँदैन र अन्य म्यानपावर कम्पनीसँग पनि क्रमशः विवरण माग गरिनेछ।

मलेसिया प्रकरण टुंगो नलागेसम्म सम्बन्धित म्यानपावर कम्पनीहरूको पूर्वस्वीकृति रोकिएको विभागले जनाएको छ। विभागले वैदेशिक रोजगार ऐनको दफा ३७ अन्तर्गत अनुसन्धान अघि बढाएको र स्पष्टीकरणपछि आवश्यक कानुनी कारबाही गरिने जनाएको छ।