आजको मौसम : मनसुन सक्रिय, वर्षाको सम्भावना कायमै

काठमाडौँ — मनसुनी प्रभावका कारण शुक्रबार देशका अधिकांश भूभागमा मौसम बदली रहनेछ। बिहानैदेखि कोशी, बागमती, लुम्बिनी, कर्णाली र सुदूरपश्चिमका केही स्थानमा वर्षा भइरहेको छ।

दिउँसो पहाडी तथा हिमाली क्षेत्रमा मेघगर्जन र चट्याङसहित वर्षा हुनसक्ने मौसम पूर्वानुमान महाशाखाले जनाएको छ। तराईका केही भूभागमा समेत वर्षाको सम्भावना रहेको छ।

• 

राति पनि वर्षाको गतिविधि पूर्ण रूपमा नरोकिने देखिएको छ। विशेषगरी कोशी, बागमती, गण्डकी, लुम्बिनी, कर्णाली र सुदूरपश्चिमका पहाडी तथा हिमाली क्षेत्रमा पानी पर्ने सम्भावना छ।

महाशाखाले वर्षासँगै चट्याङको जोखिम रहेकाले आवश्यक सतर्कता अपनाउन आग्रह गरेको छ।