सुदूरपश्चिममा ५ हजारभन्दा बढी सवारी कारबाहीमा

कञ्चनपुर । सुदूरपश्चिम प्रदेशमा गत साउनमा ट्राफिक नियम उल्लङ्घन गर्ने ५ हजार २०२ सवारीसाधन कारबाहीमा परेका छन्। कारबाहीबाट ट्राफिक प्रहरीले ४३ लाख ६३ हजार ५०० रुपैयाँ राजस्व संकलन गरेको छ।

प्रदेश प्रहरीका अनुसार साउनमा २२३ सवारी दुर्घटना हुँदा १५ जनाको मृत्यु र ३२४ जना घाइते भएका छन्। तीमध्ये अधिकांश दुर्घटना चालकको लापरबाहीका कारण भएको जनाइएको छ।

• 

ट्राफिक नियम उल्लङ्घन, क्षमताभन्दा बढी यात्रु तथा मालसामान बोक्ने सवारीमाथि कारबाहीलाई निरन्तरता दिइएको प्रहरीले जनाएको छ। दुर्घटना न्यूनीकरणका लागि जनचेतनामूलक कार्यक्रमसमेत सञ्चालन भइरहेको छ।

यसैबीच, प्रहरीले भन्सार छली ल्याइएका करिब १ करोड ७० लाख रुपैयाँ बराबरका सामान नियन्त्रणमा लिएको जनाएको छ।