दाक्सु मिडिया
नवलपरासी, असार २३ । नवलपरासी (बर्दघाट–सुस्तापूर्व) को बुलिङ्टार गाउँपालिकाका किसानहरू पछिल्लो समय विषादीरहित तरकारी उत्पादनमा सक्रिय बनेका छन्। स्वास्थ्य र वातावरणमा रासायनिक विषादीले पार्ने असरबारे सचेतना बढेसँगै कृषकहरू प्राङ्गारिक खेतीतर्फ आकर्षित भएका हुन्।
स्थानीय किसानहरूले असुरो, लसुन, अदुवा, खुर्सानी, निमका पात र गाईको पिसाबजस्ता स्थानीय सामग्री प्रयोग गरी जैविक झोल मल तयार गरेर तरकारी तथा अन्नबालीमा प्रयोग गर्दै आएका छन्। यसले उत्पादन सुरक्षित र गुणस्तरीय बन्ने विश्वास उनीहरूको छ।
किसानहरूले उत्पादन गरेका काँक्रो, टमाटर, करेला, भिण्डीलगायत तरकारी स्थानीय बजारसँगै कावासोती र नारायणघाटसम्म पुग्ने गरेका छन्। विषादीरहित तरकारीको माग बढ्दै जाँदा बजारको समस्या नरहेको र आम्दानीसमेत सन्तोषजनक रहेको कृषकहरूको भनाइ छ।
स्थानीय तहको प्रोत्साहन, तालिम र सहज सडक पहुँचका कारण बुलिङ्टारमा जैविक खेती विस्तार हुँदै गएको छ।
तपाईको प्रतिक्रिया दिनुहोस्