दाक्सु मिडिया
काठमाण्डौँ । इटालियन सुपर कपको सेमिफाइनलमा इन्टर मिलानलाई पेनाल्टी सुटआउटमा पराजित गर्दै बोलोग्ना फाइनलमा प्रवेश गरेको छ। साउदी अरेबियाको अल–अव्वाल पार्कमा भएको खेल निर्धारित ९० मिनेटमा १–१ को बराबरीमा टुंगिएपछि निर्णय पेनाल्टी सुटआउटमार्फत गरिएको थियो, जहाँ बोलोग्ना ३–२ ले विजयी बन्यो।
खेलको सुरुआतमै इन्टर मिलानले अग्रता लिएको थियो। दोस्रो मिनेटमै मार्कस थुरामले भलीमार्फत उत्कृष्ट गोल गर्दै इन्टरलाई अघि बढाएका थिए। तर ३५औँ मिनेटमा बोलोग्नाले खेलमा पुनरागमन गर्यो। भिएआरको सहायतामा ह्यान्डबल ठहर भएपछि प्राप्त पेनाल्टीलाई कप्तान रिक्कार्डो ओर्सोलिनीले सफलतापूर्वक गोलमा परिणत गरे।
त्यसपछि दुवै टोलीले केही राम्रो अवसर सिर्जना गरे पनि थप गोल हुन सकेन। दोस्रो हाफमा इन्टरले पेनाल्टीको माग गरे पनि रेफ्रीले अस्वीकार गरे। खेलको अन्तिम समयमा बोलोग्नाका गोलकिपर फेडेरिको राभालियाले शानदार बचाउ गर्दै टोलीलाई जोगाए।
पेनाल्टी सुटआउटमा इन्टर मिलानका तीन प्रहार असफल भए, जसमा राभालियाले दुई पेनाल्टी रोके। बोलोग्नातर्फ जोनाथन रोउ र सिरो इम्मोबिलेले निर्णायक पेनाल्टी सफलतापूर्वक गोलमा परिणत गरे।
यस जितसँगै बोलोग्नाले इटालियन सुपर कपको फाइनलमा स्थान सुरक्षित गरेको छ, जहाँ उसले नापोलीसँग उपाधिका लागि प्रतिस्पर्धा गर्नेछ।
तपाईको प्रतिक्रिया दिनुहोस्