सुर्खेत – कर्णाली प्रदेशको राजधानी वीरेन्द्रनगरमा प्रदेशस्तरीय भलिबल प्रतियोगिता हुने भएको छ ।
आयोजक चुली युवा क्लबले सोमबार पत्रकार सम्मेलन गरी चैत ११ देखि १४ गतेसम्म वीरेन्द्रनगरमा ‘प्रथम चुलीकप’ प्रदेशस्तरीय भलिबल प्रतियोगिता हुने जानकारी दिएको छ ।
जिल्ला खेलकुद विकास समितिको मैदानमा हुने प्रतियोगिता ‘लिक आउट फर्म्याट’मा सञ्चालन हुने आयोजकले जनाएको छ । अध्यक्ष जीसीका अनुसार प्रतियोगितामा देशभरका जुनसुकै क्लबले पनि सहभागिता जनाउन सक्नेछन् ।
कोरोना महामारीका कारण लामो समय खेलकुदका गतिविधि सुस्त भएको बेला आफूहरुले प्रतियोगिता सञ्चालन गरेर प्रदेशको खेलकुद क्षेत्रलाई चलायमान बनाउने प्रयास गरेको क्लबका अध्यक्ष महेश जीसीले बताए ।
प्रतियोगिताको विजेताले २ लाख रुपैयाँ नगद पुरस्कार प्राप्त गर्नेछ भने उपविजेताले एक लाख ५० हजार रुपैयाँ पाउनेछ । यस्तै तेस्रो हुने टिमले एक लाख र सान्त्वना स्थान प्राप्त गर्ने टिमले ५० हजार रुपैयाँ पाउनेछन् ।
फेसबुकबाट तपाईको प्रतिक्रिया