बागमती सरकार सञ्चालनमा तीन दलबीच समझदारी

काठमाडौँ:बागमती प्रदेशमा सरकारलाई स्थायित्व दिन नेकपा एमाले, नेकपा र राष्ट्रिय प्रजातन्त्र पार्टीबीच सहकार्यको सहमति जुटेको छ।

तीन दलले प्रदेश सरकार सञ्चालनका लागि ६ बुँदे सहमति गर्दै मन्त्रालयको संख्या हाल कायम ८ भन्दा नबढाउने र दलीय हैसियतअनुसार मन्त्रालय बाँडफाँट गर्ने निर्णय गरेका छन्।सहमतिअनुसार बागमती प्रदेशसभाको सभामुख नेकपाबाट चयन गरिनेछ। साथै, सरकारको आगामी कार्यदिशा तय गर्न सात दिनभित्र न्यूनतम साझा कार्यक्रम सार्वजनिक गर्ने समझदारी भएको छ।

• 

सरकार सञ्चालनमा समन्वय गर्न नेकपाको नेतृत्वमा छुट्टै संयन्त्र बनाइनेछ। मन्त्रिपरिषद्को मर्यादाक्रममा मुख्यमन्त्रीपछि नेकपा र त्यसपछि राप्रपाको प्रतिनिधित्व रहने व्यवस्था पनि सहमतिमा समेटिएको छ।

सहमतिको कार्यान्वयनसँगै बागमतीमा तीन दलबीचको राजनीतिक सहकार्य थप औपचारिक बनेको छ।