बागमती सरकारको शक्ति परीक्षण भोलि, मुख्यमन्त्री थापा संसद्मा उत्रिँदै

काठमाडौं — बागमती प्रदेशका मुख्यमन्त्री किरण थापा मगरले सोमबार प्रदेशसभामा आफ्नो सरकारको पक्षमा बहुमत जुटेको प्रमाणित गर्ने भएका छन्।

प्रदेशसभा सचिवालयले भदौ ८ गते दिउँसो १ बजे बैठक बोलाएको छ। उक्त बैठकमा मुख्यमन्त्री थापाले विश्वासको मत लिने कार्यसूची तय भएको छ।

एमाले, नेपाली कम्युनिष्ट पार्टी (नेकपा) र राष्ट्रिय प्रजातन्त्र पार्टी (राप्रपा)को समर्थनमा मुख्यमन्त्री बनेका थापाले यसअघि भदौ ७ गते नै विश्वासको मत लिने तयारी गरेका थिए। पछि मिति परिवर्तन गरी सोमबारका लागि बैठक बोलाइएको हो।

• 

संविधानको धारा १६८(२) अनुसार भदौ ४ गते मुख्यमन्त्री नियुक्त भएका थापाका लागि सोमबारको मतदान सरकारको आगामी राजनीतिक दिशाका लागि महत्वपूर्ण मानिएको छ।

१०४ सदस्यीय बागमती प्रदेशसभामा सरकारलाई बहुमत कायम गर्न कम्तीमा ५३ सांसदको समर्थन आवश्यक पर्छ।