कात्तिक २० र २१ गते देशभर भिटामिन ‘ए’ र जुकाको औषधि खुवाइने

काठमाडौँ, आउँदो कात्तिक २० र २१ गते देशभरिका पाँच वर्षमुनिका बालबालिकालाई भिटामिन ‘ए’ क्यापसुल तथा जुकाको औषधि खुवाइने भएको छ।

स्वास्थ्य सेवा विभाग अन्तर्गतको परिवार कल्याण महाशाखाका अनुसार, हरेक वर्ष वैशाख र कात्तिकमा सञ्चालन हुँदै आएको यो कार्यक्रम यस वर्ष लक्ष्मी पूजाको दिन परेको कारण सारिएको हो। मन्त्रालयको सचिवस्तरीय निर्णय अनुसार नयाँ मिति तय गरिएको हो।

• 

• 

महाशाखाका निर्देशक डा. विवेककुमार लालका अनुसार, देशभरका ७५३ वटै पालिकामा सञ्चालन हुने यो दुईदिने अभियानमा झन्डै २८ लाख बालबालिकालाई भिटामिन ‘ए’ र करिब ३० लाख बालबालिकालाई जुकाको औषधि खुवाउने लक्ष्य राखिएको छ।

कार्यक्रम सफल बनाउन ५२ हजार स्वास्थ्य स्वयंसेविका र १५ हजार स्वास्थ्यकर्मी परिचालन गरिनेछ। अघिल्लो चरणमा झन्डै ९० प्रतिशत बालबालिकाले भिटामिन ‘ए’ क्यापसुल सेवन गरेका थिए भने ८७ प्रतिशतले जुकाको औषधि खाएका थिए।

स्वास्थ्य अधिकारीहरूले बालबालिकाको पोषण सुधार र जुकाबाट बचाउन अभिभावकहरूलाई तोकिएको मितिमा बालबालिकालाई नजिकको खोप केन्द्र वा स्वास्थ्य संस्थामा लगेर औषधि खुवाउन अनुरोध गरेका छन्।