पाकिस्तानमा मनसुनी वर्षासँगै विपद्: ११ जनाको मृत्यु, २७ घाइते

काठमाडौँ : पाकिस्तानमा भारी मनसुनी वर्षासँगै आएको आँधीबेहरी र तीव्र हावाका कारण विभिन्न क्षेत्रमा कम्तीमा ११ जनाको मृत्यु भएको छ भने २७ जना घाइते भएका छन्।

प्रान्तीय विपद् व्यवस्थापन प्राधिकरणका अनुसार खैबर पख्तुनख्वा प्रान्तमा एक महिला र तीन बालबालिकासहित ६ जनाको ज्यान गएको छ भने १९ जना घाइते भएका छन्। वर्षाका कारण दुई घर पूर्ण रूपमा ध्वस्त भएका छन् भने ३८ घरमा आंशिक क्षति पुगेको छ।

• 

त्यसैगरी पञ्जाब प्रान्तको अटक जिल्लामा पर्खाल ढल्दा दुई बालबालिकाको मृत्यु भएको छ भने ३ जना घाइते भएका छन्। बलुचिस्तानमा पनि एक महिला र बालबालिकासहित ३ जनाको मृत्यु भएको र थप ५ जना घाइते भएको जनाइएको छ।

अधिकारीहरूले आगामी दिनमा अझै भारी वर्षाको सम्भावना रहेको चेतावनी दिँदै पहिरो, आकस्मिक बाढी र अन्य सम्भावित जोखिमबाट सतर्क रहन स्थानीय बासिन्दालाई आग्रह गरेका छन्।