टेलिकममा सुधारः डाटा सकिँदा अब स्वतः पैसा नकाटिने

काठमाडौँ । नेपाल टेलिकमले ग्राहकको लामो समयदेखिको गुनासो सम्बोधन गर्दै डाटा सकिएपछि स्वतः मुख्य ब्यालेन्सबाट पैसा काटिने प्रणाली अन्त्य गर्ने भएको छ ।

अब ग्राहकले डाटा प्याकेज ९० प्रतिशत सकिँदा पूर्वसूचना पाउनेछन् र त्यसपछि नयाँ प्याकेज लिने वा ‘पे–एज–यू–गो’ विकल्प रोज्ने निर्णय आफैं गर्न सक्नेछन्।

• 

• 

सञ्चार तथा सूचना प्रविधि मन्त्रालयको निर्देशनपछि टेलिकमले सेवा सुधारका लागि १० बुँदे कार्ययोजना लागू गर्दै ग्राहक सेवा, डिजिटल सेवा विस्तार र प्रशासनिक प्रक्रिया सरल बनाउने काम अघि बढाएको हो ।

यससँगै ‘वन टाइम केवाइसी’ प्रणाली, अनलाइन सेवा विस्तार (ई–सिम, गुनासो व्यवस्थापन, सिम पुनःप्राप्ति आदि) र ‘एकल विन्दु सेवा’ सहायता कक्ष स्थापना गर्ने योजना पनि कार्यान्वयनमा ल्याइँदैछ।

टेलिकमका अनुसार नयाँ प्रणाली केही दिनभित्र पूर्ण रूपमा लागू हुनेछ र यसले ग्राहकलाई थप पारदर्शी तथा सहज सेवा प्रदान गर्ने अपेक्षा गरिएको छ।