महाकुलुङ गाउँपालिकामा प्रारम्भिक बाल विकास योजना तर्जुमा कार्यशाला सम्पन्न

दाक्सु मिडिया

२०८२ असार २

असार २, सोलुखुम्बु — महाकुलुङ गाउँपालिकामा दुईदिने “एकीकृत प्रारम्भिक बाल विकास योजना तर्जुमा कार्यशाला” सम्पन्न भएको छ। चाइल्ड नेटवर्क फाउन्डेशन र सेतो गुराँस राष्ट्रिय बाल विकास सेवाको सहकार्यमा आयोजित कार्यशालामा प्रारम्भिक बाल विकासमा लगानीको आवश्यकता र स्थानीय तहको भूमिका स्पष्ट पारिएको थियो।

कार्यशालाबाट ११ सदस्यीय विषयगत समिति गठन गरिएको छ, जसले शिक्षा, स्वास्थ्य, पोषण, कृषि, सरसफाइ लगायतका क्षेत्रमा एकीकृत योजना बनाउनेछ। आगामी आर्थिक वर्ष २०८२/८३ का लागि करिब १५ लाख रुपैयाँ बराबरको बाल विकास योजना माग गरिने प्रतिबद्धता पनि व्यक्त गरिएको छ।

३६ सहभागीले गर्भावस्थादेखि ८ वर्षसम्मका बालबालिकाको सर्वोत्तम हित सुनिश्चित गर्न समन्वयात्मक भूमिकाको प्रतिबद्धता जनाएका छन्। गाउँपालिका अध्यक्ष सूर्य बहादुर राईको अध्यक्षतामा सम्पन्न कार्यशालामा विभिन्न सरकारी तथा गैरसरकारी निकायका प्रतिनिधिको उल्लेखनीय उपस्थिति रहेको थियो।