रसुवाको बाढीलाई परराष्ट्रमन्त्री खनालले भने ‘हिमालयन सुनामी’

काठमाडौँ । परराष्ट्रमन्त्री शिशिर खनालले रसुवामा गएको विनाशकारी बाढीलाई ‘हिमालयन सुनामी’को संज्ञा दिएका छन्।

बिहीबार प्रतिनिधिसभाको अन्तर्राष्ट्रिय सम्बन्ध तथा पर्यटन समितिको बैठकमा बोल्दै मन्त्री खनालले बाढीले नेपालको विकास र समृद्धिको योजनामा ठूलो असर पारेको बताए।

• 

भदौ १० गते आएको बाढीले रसुवा, नुवाकोट, धादिङ र चितवनका नदी तटीय क्षेत्रमा क्षति पुर्‍याएको थियो। सरकारले यसको प्रमुख कारण जलवायु परिवर्तनलाई मानेर थप अध्ययन गरिरहेको उनले जानकारी दिए।

खनालले नेपालको पूर्वाधार, जलविद्युत्, बस्ती र बजार विकास नदी करिडोरसँग जोडिएकाले यस्ता विपद्को जोखिमबारे गम्भीर अध्ययन आवश्यक रहेको बताए। साथै, हिमालय क्षेत्रसम्बन्धी अध्ययन–अनुसन्धानलाई एकीकृत गरी नेपालको स्पष्ट राष्ट्रिय धारणा बनाउनुपर्नेमा उनले जोड दिए।