ओपनएआईले एपको सट्टा एआई एजेन्टमा चल्ने स्मार्टफोन ल्याउँदै

काठमाण्डौँ । च्याटजीपीटी निर्माता कम्पनी ओपनएआईले विकास गरिरहेको ‘एआई-फर्स्ट’ स्मार्टफोनको व्यावसायिक उत्पादन सन् २०२७ को सुरुवातदेखि सुरु हुने अपेक्षा गरिएको छ। प्रविधि बजार विश्लेषक मिङ-ची कुओका अनुसार यसअघि सन् २०२८ मा मात्रै उत्पादन सुरु हुने अनुमान गरिएको भए पनि परियोजना हाल तीव्र गतिमा अघि बढिरहेको छ।

कुओका अनुसार यदि निर्माण कार्य निर्धारित समयमै सम्पन्न भयो भने सन् २०२७ र २०२८ भित्र करिब तीन करोड युनिट बजारमा पठाइने अनुमान छ। यो सङ्ख्या सामसङको ग्यालेक्सी एस२५ सिरिजको पहिलो वर्षको सम्भावित बिक्रीसँग मिल्दोजुल्दो मानिएको छ।

• 

• 

• 

हाल बजारमा उपलब्ध अधिकांश स्मार्टफोनहरू एप-केन्द्रित प्रणालीमा आधारित छन्। तर ओपनएआईको नयाँ फोन पूर्ण रूपमा ‘एआई एजेन्ट’मा आधारित हुने बताइएको छ, जसले प्रयोगकर्ताको आवश्यकता अनुसार स्वतः काम गर्ने क्षमतामा जोड दिनेछ।

यस स्मार्टफोनमा मिडियाटेकको ‘डाइमेन्सिटी ९६००’ प्रोसेसरको कस्टमाइज्ड संस्करण प्रयोग गरिने अपेक्षा गरिएको छ। उक्त प्रोसेसर सन् २०२६ को तेस्रो त्रैमासिकमा सार्वजनिक हुन सक्ने अनुमान गरिएको छ।

यसैबीच, एप्पलका पूर्व प्रमुख डिजाइनर जोनी आइभ गत वर्षको जुलाईदेखि ओपनएआईको डिजाइन विभागमा आबद्ध भएका छन्, जसले यस परियोजनालाई थप आकर्षक बनाउने अपेक्षा गरिएको छ।