‘गफ होइन काम’ नारासहित उज्यालो नेपालको घोषणापत्र सार्वजनिक

काठमाडौँ — उज्यालो नेपाल पार्टीले प्रतिनिधि सभा निर्वाचनका लागि आफ्नो घोषणापत्र सार्वजनिक गरेको छ। ‘गफ होइन काम, भाषण होइन परिणाम’ भन्ने नारासहित सार्वजनिक दस्तावेजमा शासन सुधार, भ्रष्टाचार नियन्त्रण र आर्थिक समृद्धिलाई मुख्य एजेन्डा बनाइएको छ।

पार्टीले प्रदेशमा प्रत्यक्ष निर्वाचित मुख्यमन्त्रीको व्यवस्था गर्ने प्रस्ताव अघि सारेको छ। साथै, सङ्घीय संसदको संख्या २७५ बाट २०१ र प्रदेश सांसद ५५० बाट ३३० मा झार्ने योजना पनि समेटिएको छ। मन्त्रालयको संख्या घटाएर राज्य खर्च कटौती गर्ने लक्ष्य लिइएको छ।

• 

भ्रष्टाचारविरुद्ध कडा नीति अवलम्बन गर्दै भ्रष्टाचारीलाई सार्वजनिक पदमा आजीवन प्रतिबन्ध लगाउने र सम्पत्ति राष्ट्रियकरण गर्ने प्रतिबद्धता जनाइएको छ। मतदातालाई ‘नो भोट’ को विकल्प दिने प्रस्ताव पनि घोषणापत्रमा राखिएको छ।

आर्थिक क्षेत्रमा सन् २०३० सम्म ९ प्रतिशत वार्षिक वृद्धि हासिल गर्ने र प्रत्येक वर्ष ९ लाख रोजगारी सिर्जना गर्ने लक्ष्य राखिएको छ। हरेक परिवारलाई जलविद्युत् आयोजनामा न्यूनतम १ हजार कित्ता सेयर उपलब्ध गराउने बाचा गरिएको छ।

त्यस्तै, विश्वविद्यालय तहसम्म निःशुल्क शिक्षा र तोकिएका स्वास्थ्य संस्थामा निःशुल्क उपचारको व्यवस्था गर्ने, साथै ‘कमाउँदै पढ्दै’ कार्यक्रममार्फत विद्यार्थीलाई इन्टर्नसिपको अवसर दिने योजना पनि घोषणापत्रमा समेटिएको छ।