बन्दसूचीबाट उम्मेदवारले नाम फिर्ता लिए अर्को थप्न पाउने प्रबन्ध

आसन्न प्रतिनिधिसभा सदस्य निर्वाचनका लागि समानुपातिक प्रणालीतर्फको बन्दसूचीमा समावेश उम्मेदवारले आफ्नो नाम फिर्ता लिन सक्ने र त्यस स्थानमा दलले अर्को उम्मेदवार थप्न पाउने व्यवस्था भएको छ।

निर्वाचन आयोगका अनुसार ६४ राजनीतिक दलबाट प्राप्त उम्मेदवारीको मनोनयन यही पुस १३ र १४ गते गरिसकिएको छ। आयोगका प्रवक्ता नारायणप्रसाद भट्टराईले बताए अनुसार, कानुनअनुसार समावेशी समूहको मिलान गरेर पुस २० भित्र दललाई सूचीको जानकारी दिइनेछ। दलहरूले पुस २७ भित्र संशोधित सूची पेश गर्न सक्नेछन्।

• 

सुधारिएको सूचीमा परेका उम्मेदवारले आफ्नो नाम फिर्ता लिन पुस २८ मा आवेदन दिन सक्नेछन्। आयोगले फिर्ता हुने उम्मेदवारबारे सम्बन्धित दललाई जानकारी दिनेछ र दलले अर्को उम्मेदवार थप्न पाउनेछ। बन्दसूची माघ ४ मा सार्वजनिक गरिनेछ।आम सर्वसाधारणले उम्मेदवार अयोग्य भएको दाबी गरेमा छानबिन गरी माघ २० मा अन्तिम नामावली प्रकाशन गरिनेछ। त्यसपछि सूची परिवर्तन हुने छैन।