कोशी, बागमती र गण्डकीका पहाडी क्षेत्रमा आज मध्यम वर्षाको सम्भावना

काठमाडौँ । हाल देशमा मनसुनी वायुको प्रभाव केही कमजोर भए तापनि स्थानीय वायुको आंशिक प्रभाव रहेको जल तथा मौसम विज्ञान विभाग मौसम पूर्वानुमान महाशाखाले जनाएको छ।

आज दिउँसो कोशी, बागमती र गण्डकी प्रदेशका पहाडी भूभागहरूमा सामान्य बदली रही मध्यम वर्षाको सम्भावना रहेको छ। बाँकी भूभागमा आंशिक बदलीको अवस्था रहने विभागले जनाएको छ।

• 

• 

महाशाखाका अनुसार राति पनि यिनै प्रदेशका पहाडी क्षेत्रमा सामान्य बदली रहनेछ भने अन्य स्थानहरूमा आंशिक बदलीको अवस्था रहनेछ।

वर्षाका कारण पहाडी भूभागका केही स्थान तथा तराईका एक-दुई स्थानमा पनि मध्यम वर्षा हुनसक्ने सम्भावना रहेकोले पहिरो, गेग्रान बहाव (डेब्रिज फ्लो), तथा नदी-नालामा पानीको सतह बढ्ने जोखिम रहेको महाशाखाले चेतावनी दिएको छ।

यातायात, कृषि र जनजीवन प्रभावित हुनसक्ने भएकाले सम्बन्धित निकाय तथा सर्वसाधारणलाई सतर्क रहन र आवश्यक पूर्वतयारी गर्न आग्रह गरिएको छ।