चाडपर्वमा हुन सक्ने अपराध रोक्न उपत्यकामा विशेष सुरक्षा घेरा

काठमाडौं । दसैँ, तिहार र छठको चहलपहल बढेसँगै काठमाडौं उपत्यकामा प्रहरीले सुरक्षा निगरानी तीव्र पारेको छ। चाडपर्वका बेला हुन सक्ने चोरी, लुटपाट, पाकेटमारी र ठगीजस्ता घटनालाई नियन्त्रण गर्ने उद्देश्यले ३ हजार ५०६ प्रहरी परिचालन गरिएको हो।

जिल्ला प्रहरी परिसर काठमाडौंका अनुसार परिचालित प्रहरीमध्ये एक सय जना सादा पोसाकमा खटिएका छन्। बजार, बसपार्क, वित्तीय संस्था र सर्वसाधारणको बढी भीड हुने स्थानमा विशेष निगरानी राखिएको छ।

• 

• 

सुरक्षा व्यवस्थालाई प्रभावकारी बनाउन उपत्यकाका १४ सेक्टरमा योजना लागू गरिएको छ। नियमित गस्तीका अतिरिक्त ड्रोन क्यामेरा, तालिमप्राप्त कुकुर तथा अन्य प्रविधिको सहयोगसमेत लिइने प्रहरीले जनाएको छ।

चाडपर्वमा घरबाहिर निस्किने र यात्रा गर्ने नागरिकको सङ्ख्या बढ्ने भएकाले आफ्नो घर तथा सम्पत्तिको सुरक्षामा ध्यान दिन र शङ्कास्पद गतिविधि देखिएमा प्रहरीलाई खबर गर्न सर्वसाधारणलाई आग्रह गरिएको छ।