गोठालो गएका दुई महिलाको ज्यान गयो

काठमाडौं — रोल्पाको सुनछहरी गाउँपालिका–१ सेरमस्थित दवाङ लेकमा शनिबार दिउँसो आएको पहिरोमा परी गोठालो गएका दुई महिलाको मृत्यु भएको छ भने एक पुरुष घाइते भएका छन्।

जिल्ला प्रहरी कार्यालय रोल्पाका अनुसार पहिरोमा परी ५१ वर्षीया असौजी घर्ती मगर र ३६ वर्षीया अमरा घर्ती मगरको घटनास्थलमै मृत्यु भएको हो। स्थानीयवासी र प्रहरीको संयुक्त टोलीले साँझ दुवै जनाको शव पहिरोबाट बाहिर निकालेको थियो।

• 

• 

• 

घटनामा ६० वर्षीय कुले घर्ती मगर घाइते भएका छन्। उनको उद्धार गरी सेरम स्वास्थ्य चौकीमा उपचारका लागि पठाइएको प्रहरीले जनाएको छ।

पहिरोमा चारवटा बाख्रा र दुईवटा गाईसमेत पुरिएका थिए। ती चौपायालाई पनि सुरक्षित रूपमा बाहिर निकालिएको प्रहरीले जानकारी दिएको छ।