जलवायु संकटको राप: एक्लै होइन सामूहिक पाइलाको खाँचो

काठमाडौँ – कृषि, पशुपंक्षी विकास, वन तथा वातावरण मन्त्री गीता चौधरीले जलवायु परिवर्तन केवल वातावरणीय समस्या नभई आर्थिक र सामाजिक संकटको रूपमा देखापरेको बताएकी छन्। उनले यस संकट समाधानका लागि सबै क्षेत्रको सक्रिय सहभागिता अपरिहार्य रहेको बताइन्।

मन्त्री चौधरीले काठमाडौंमा आयोजित कार्यक्रममा भनिन् कि हिमनदी पग्लिने, असामान्य वर्षा, बाढी–पहिरो र खडेरीले जनजीवन र विकासमा गम्भीर असर पारिरहेको छ। उनका अनुसार नेपालजस्तो न्यून कार्बन उत्सर्जन गर्ने देश पनि जलवायु परिवर्तनका प्रभाव बढी भोग्न बाध्य छ।

• 

• 

• 

उनले राष्ट्रिय निर्धारित योगदान (एनडिसी) अन्तर्राष्ट्रिय प्रतिवद्धता अनुसार तयार पारिएको र पेश गरिएको भए तापनि यसको प्रभावकारी कार्यान्वयन चुनौतीपूर्ण रहेको बताइन्। “अब हाम्रो प्रमुख ध्यान यसको प्रभावकारी कार्यान्वयनमा केन्द्रित हुनुपर्छ,” उनले भनिन्।

मन्त्री चौधरीले जलवायु संकटको दीगो समाधानका लागि संघ, प्रदेश र स्थानीय तह, निजी क्षेत्र, नागरिक समाज तथा सञ्चारमाध्यमबीच सहकार्य अत्यावश्यक भएको औँल्याइन्। साथै, नेपालले वन संरक्षण, जैविक विविधता संरक्षण र वातावरणीय सन्तुलन कायम राख्न महत्वपूर्ण उपलब्धि हासिल गरेको उनले उल्लेख गरिन्।

उनको भनाइ अनुसार जलवायु परिवर्तनको सामना गर्नु हामी सबैको साझा जिम्मेवारी हो र यसको असर कम गर्न सबै सरोकारवालाको सक्रिय भूमिका आवश्यक छ।