आफूले जितेमा क्षेत्रको विकास र जनताका समस्या समाधान गर्ने मतदातासँग कार्कीको प्रतिबद्धता

काठमाडौं । देशभरका उम्मेदवारहरू यतिबेला मतदाताको घरदैलोमा छन् । उनीहरू दिउँसोभन्दा बढी बिहान र साँझको समयमा मतदाता भेट्न पुग्छन् । चुनाव नजिकिएसँगै नेताले मतदातालाई हात जोडेर नमस्कार गरिरहने र मतदाताले घरको छत वा बार्दलीबाट हात हल्लाउने दैनिकजस्तै बनेको छ ।

सामान्य अवस्थामा नेतालाई मतदाताले नमस्कार गर्ने चलन भए पनि चुनावी माहोलमा भने परिस्थिति ठिक उल्टो छ । यतिबेला नेताहरू मतदातालाई हात जोडेर नमस्कार गरिरहेका छन् । सहरी क्षेत्रमा चुनावी घरदैलोको दृश्य अझ रमाइलो छ ।

सधैँ स्टेज वा उच्च आसनमा बस्ने नेता–कार्यकर्ताहरू मतदाताको घरमुनि सडकबाट नमस्कार गर्दै हिँड्छन् भने मतदाताहरू घरको छत वा बार्दलीबाट हात हल्लाउँदै नेताको आसनमा देखिन्छन् । तर, गाउँघरमा भने उम्मेदवारहरू घरमा भन्दा पनि मतदाताको खेतबारी र मेलापातमा पुग्छन्, जहाँ पनि नेताले मतदातालाई नमस्कार गर्छन् ।

• 

• 

• 

माइकिङ गर्नेले ‘आदरणीय टोलबासी दाजुभाइ दिदीबहिनी, यहाँहरूको उम्मेदवार तोसिमा कार्की तपाईंको घरदैलोमा आइपुग्नुभएको छ’ भनिरहेका थिए । चोकमा केही मतदाताहरू कार्कीलाई पर्खेर जम्मा भइसकेका थिए । माइकिङ गर्दै कार्यकर्ता अगाडि नै आइपुगे पनि उम्मेदवार कार्की भने पाँच मिनेट ढिलो आइपुगिन् । उनले सडकबाटै घरको छत वा बार्दलीबाट हात हल्लाउने मतदातालाई हात जोडेर नमस्कार गर्दै अघि बढिन् । चोकमा जम्मा भएका महिला मतदाताहरूले तोसिमालाई जितको शुभकामना दिँदै अंगालो हाले र सबैले आ–आफ्नो मोबाइलबाट सेल्फी लिए ।

सेल्फी खिचिसकेपछि ७० वर्षीया सलिना अधिकारीले कार्कीलाई अँगालो हाल्दै यसपटक आफ्नो परिवारले ‘घण्टी’मा भोट दिने बताइन् ।

त्यस्तै करिब ४५ वर्षकी अर्की एक महिला मतदाताले पनि कार्कीलाई अँगालो हाल्दै ‘जेनजी आन्दोलनमा भएको ज्यादतीका कारण आफूले यो पटक परिवर्तनको पक्षमा घण्टीलाई भोट हाल्ने र त्यसका लागि पहिलो पटक लाइन बसेर मतदाता नामावलीमा नाम लेखाएको बताइन् । उनले आफ्नो परिवारका सबैको भोट घण्टीमै जाने सहमति भएको पनि सुनाइन् । कार्कीले मतदाताको मायाले नै आफू पुनः चुनावी मैदानमा आएको र उनीहरूको आशीर्वादले आगामी दिनमा यस क्षेत्रको विकासमा प्रतिबद्ध भएर लाग्ने बताइन् ।