ऐसेलुखर्क र रावा बेसी गाउँपालिकाबीच अन्तर–समन्वयात्मक बैठक सम्पन्न

खोटाङ । ऐसेलुखर्क गाउँपालिका र रावा बेसी गाउँपालिकाबीच आइतबार अन्तर–समन्वयात्मक बैठक सम्पन्न भएको छ।

ऐसेलुखर्क गाउँपालिका अध्यक्ष गीरेन्द्र बहादुर राईको अध्यक्षतामा आयोजित उक्त बैठकमा रावा बेसी गाउँपालिका अध्यक्ष फटिक कुमार श्रेष्ठको प्रमुख आतिथ्यता रहेको थियो । बैठकमा ऐसेलुखर्क गाउँपालिका उपाध्यक्ष राजेश कुमार राजभण्डारी, दुवै गाउँपालिकाका प्रमुख प्रशासकीय अधिकृतहरू तथा दुवैतर्फका वडा अध्यक्षहरूको उल्लेखनीय उपस्थिति रहेको थियो।

• 

बैठकमा दुवै गाउँपालिकाबीच आपसी समन्वय, विकास निर्माणका साझा विषय, सेवा प्रवाहलाई प्रभावकारी बनाउने उपाय तथा स्थानीय तहबीच सहकार्य सुदृढ गर्ने विषयमा छलफल गरिएको थियो । सहभागीहरूले आपसी सहकार्य र अनुभव आदान–प्रदानमार्फत स्थानीय विकासलाई अझ प्रभावकारी बनाउने प्रतिबद्धता व्यक्त गरेका थिए ।

यस प्रकारका अन्तर–समन्वयात्मक बैठकले स्थानीय तहबीचको सहकार्यलाई मजबुत बनाउँदै समग्र विकासमा टेवा पुग्ने अपेक्षा गरिएको छ।