इरानविरुद्ध नेपालको कठिन चुनौती

काठमाडौँ । काठमाडौँमा जारी काभा महिला भलिबल च्याम्पियनसिपअन्तर्गत नेपालले बिहीबार सेमिफाइनलमा साबिक विजेता इरानसँग प्रतिस्पर्धा गर्दैछ। त्रिपुरेश्वरस्थित राखेप कभर्डहलमा खेल अपराह्न ५ बजे सुरु हुनेछ।

समूह चरणमा भारतसँग पराजित भए पनि नेपालले किर्गिजस्तान र माल्दिभ्सलाई हराउँदै अन्तिम चारमा स्थान बनाएको हो। अब नेपाल फाइनल पुग्ने लक्ष्यसहित कोर्टमा उत्रिनेछ।

• 

• 

• 

इरान भने प्रतियोगितामा उत्कृष्ट लयमा देखिएको टोली हो। उसले समूह चरणका सबै खेल सोझो सेटमा जित्दै सेमिफाइनल यात्रा तय गरेको छ। इरानले हालसम्म एक सेट पनि गुमाएको छैन।

नेपाल र इरानबीच अघिल्लो वर्ष काभा नेसन्स लिगमा प्रतिस्पर्धा भएको थियो। त्यसबेला नेपालले सेमिफाइनलमा इरानलाई ३–२ ले हराएर फाइनल पुगेको थियो। यसपटक पनि घरेलु समर्थकमाझ नेपाल त्यही नतिजा दोहोर्याउने लक्ष्यमा हुनेछ।