एसबीआई बैंक लुटपाट : प्रहरीले १ करोड ८० लाख नगद फेला पार्‍यो

काठमाडौँ । सिन्धुली जिल्लाको घ्याङलेख गाउँपालिकामा अवस्थित नेपाल एसबीआई बैंकको शाखाबाट लुटिएको नगद रकममध्ये १ करोड ८० लाख रुपैयाँ प्रहरीले बरामद गरेको छ।

सिन्धुली प्रहरीले दिएको जानकारीअनुसार लुटिएको रकममध्ये ठूलो हिस्सा फेला परेको भए पनि घटनामा संलग्न लुटेराहरूको खोजी कार्य भने अझै जारी छ।

• 

मंगलबार साँझ चारदेखि पाँच जनाको समूहमा आएका लुटेराहरूले बैंकमा कार्यरत सुरक्षागार्डमाथि कुटपिट गर्दै नगद लुटेका थिए। कुटपिटबाट सुरक्षागार्ड रुद्र कार्की घाइते भएका छन्। उनको हातमा चोट लागेको र उपचार भइरहेको प्रहरीले जनाएको छ।

प्रहरीले घटनाको अनुसन्धान तीव्र पारेको र दोषीलाई चाँडै नियन्त्रणमा लिने प्रयास भइरहेको जनाएको छ।