हजारौँ मानिसहरुको भीडभाड रहेको काबुल एयरपोर्टमा अमेरिकी सेनाले चलायो गोली

काठमाडौं । हजारौँ मानिसहरुले भरिभराउ बनेको अफगानिस्तानको राजधानी काबुलस्थित अन्तरािष्ट्रय विमानस्थलमा अमेरिकी सेनाले गोली चलाएको छ ।

विद्रोही समूह तालिबानले देश कब्जा गरेपछि अफगानिस्तानको राजधानी काबुलस्थित विमानस्थलमा देश छोड्नेको लर्को लागेको अवस्थामा सेनाले गोली चलाएको हो ।

भीड अनियन्त्रित भएको कारण अमेरिकी सेनाले गोली चलाएको अन्तराष्ट्रिय मिडियाले जनाएका छन् ।

समाचार संस्था एएफपीका अनुसार आफ्ना राजदूत, कर्मचारी, नागरिक र अन्य विदेशीलाई काबुलबाट बाहिर जान सघाउने उद्देश्यले अमेरिकी सेनाले विमानस्थल नियन्त्रणमा लिएको हो। विमानस्थलमा अनियन्त्रित भिड भएपछि सोमबार बिहान केही राउन्ड हवाई फायर गरिएको एएफपीले जनाएको छ।

• 

• 

अत्यधिक भीडको कारण अहिले काबुलको अन्तर्राष्ट्रिय विमानस्थल अस्तव्यस्त देखिएको छ । मिडियाले विमानस्थल कुनै अव्यवस्थित बसपार्क जस्तै बनेको बताएका छन् ।

डेलिमेलका अनुसार काबुलको विमानस्थलमा गोली चलेसँगै सैन्य उडानबाहेकका सबै उडान रद्द गरिएको छ । अहिले विमानस्थललाई अमेरिकी सेनाले सुरक्षा दिइरहेको छ । साथै उसले अफगानिस्तानको एयर ट्राफिक कन्ट्रोललाई पनि आफ्नो नियन्त्रणमा लिएको छ ।

समाचारमा उल्लेख गरिएअनुसार नेटोका एक अधिकारीले सेनाको विमानबाहेक अन्य सबै व्यवसायिक उडान रद्द गरिएको जानकारी दिएका हुन् । नेटोले विमानस्थललाई पुनः सञ्चालनमा ल्याउन प्रयास गरिरहेको बताएको छ ।

तालिबानले देश नियन्त्रणमा लिएसँगै राष्ट्रपति अशरफ घानीले हिजो नै देश छोडेका छन् । अब शान्तिपूर्ण रुपमा सत्ता हस्तान्तरणको तयारी भइरहेको छ।