६० वर्षको उमेरमा दुर्गाप्रसादले लिए नेपाली नागरिकता

इलाम – जिल्ला प्रशासन कार्यालय इलामले भारतको जेलमा ४० वर्ष बसेर जेलमुक्त भएका दुर्गाप्रसाद तिम्सिनाले नेपाली नागरिकता दिएको छ । ४० वर्षपछि भारतीय जेलबाट छुटेर आएका इलामका तिम्सिनालाई बिहीबार इलामका प्रमुख जिल्ला अधिकारी ध्रुव बहादुर खड्काले नागरिकता दिएका हुन् ।

प्रदेश नं. १ ले तिम्सिनाको उपचार गर्ने निर्णय गरेपछि जिल्ला प्रशासनले वंशजको आधारमा नागरिकता दिएको खड्काले बताए । ‘प्रदेश सरकारले उहाँलाई तत्काल नागरिकता दिएर उपचार गर्ने निर्णय गरेअनुसार नागरिकता दिइएको हो,’ खड्काले भने।

• 

• 

२०१७ साल साउन २० मा जन्मेका दुर्गाप्रसादले माई नगरपालिका–१० ठेगानाको नागरिकता पाएको कार्यालयले जनाएको छ।

नागरिकतामा उनको नाम दुर्गाप्रसाद तिम्सिना नै लेखिएको छ। भारतस्थित जेल र अदालतमा भने उनको नाम दीपक जैसी रहेको जनाइएको छ ।