बागमतीको बाढीमा फसेका १४ जनाको उद्धार

रौतहट, असार ७ — बागमती नदीको बाढीका कारण टापुमा फसेका १४ जना स्थानीयको सशस्त्र प्रहरी र नेपाल प्रहरीको संयुक्त टोलीले सकुशल उद्धार गरेको छ।

दुर्गाभगवती गाउँपालिका–३ स्थित मत्सरी घाट नजिकै मुंग टिप्न गएका उनीहरू नदीको बहाव बढेपछि बीच भागमा थुनिएका थिए। उद्धार गरिएकामध्ये ११ महिला र ३ बालिका रहेका छन्।

• 

सशस्त्र प्रहरीको विपद् व्यवस्थापन टोलीले रबर बोटको सहायताले करिब डेढ घण्टाको प्रयासपछि सबैलाई सुरक्षित किनारमा ल्याएको जनाएको छ। उद्धार गरिएकाहरूको स्वास्थ्य अवस्था सामान्य रहेको प्रहरीले जनाएको छ।