इबोला नियन्त्रणमा विश्वव्यापी सहकार्य आवश्यक : डब्लुएचओ

बुनिया, जेठ १७ — विश्व स्वास्थ्य सङ्गठन (डब्लुएचओ) ले कङ्गो र युगान्डामा फैलिएको इबोला संक्रमण नियन्त्रणका लागि अन्तर्राष्ट्रिय सहयोग अपरिहार्य रहेको जनाएको छ। डब्लुएचओका महानिर्देशक ड्रोस अधानोम गेब्रेयेससले यात्रा प्रतिबन्ध र सीमा बन्दजस्ता कदमले रोग नियन्त्रणमा बाधा पुग्न सक्ने बताएका छन्।

कङ्गोको बुनियामा आयोजित कार्यक्रममा उनले प्रभावित समुदायसँग विश्वास र पारदर्शिताका आधारमा काम गर्नुपर्नेमा जोड दिए। उनका अनुसार समयमै उपचार पाए इबोला संक्रमित धेरै बिरामीको ज्यान बचाउन सकिन्छ।

• 

• 

• 

यता, युगान्डामा थप दुई नयाँ संक्रमण पुष्टि भएपछि कुल संक्रमितको संख्या नौ पुगेको छ। कङ्गो सरकारले भने आगामी चारदेखि छ महिनाभित्र प्रकोप नियन्त्रणमा ल्याउने लक्ष्य लिएको जनाएको छ।