कांग्रेसको प्रशिक्षण प्रतिष्ठानमा परमाणु वैज्ञानिकदेखि क्रिकेटरसम्म नियुक्त

काठमाण्डौँ । नेपाली कांग्रेसले विभिन्न विषयविज्ञहरू समेटेर केन्द्रीय नीति अनुसन्धान, तथा प्रशिक्षण प्रतिष्ठान विस्तार गरेको छ ।

उपसभापति विश्वप्रकाश शर्माले ३९ जनालाई प्रशिक्षण प्रतिष्ठानमा नियुक्त गर्दा विभिन्न विषयविज्ञहरू पनि परेका छन् ।

प्रतिष्ठानका प्रमुख शर्माले विपद् व्यवस्थापन विज्ञदेखि चलचित्रका निर्देशकसम्मलाई सदस्य नियुक्त गरेका छन् ।

उनले विपद् व्यवस्थापन विज्ञ मनबहादुर थापालाई प्रशिक्षण प्रतिष्ठानको सदस्य बनाएका छन् ।

थापा कृषी अर्थशास्त्रमा फिलिपिन्सबाट स्नातकोत्तर एवं प्राकृतिक श्रोत व्यवस्थापनमा अमेरिका न्युयोर्कको कर्णेल युनिभर्सिटीबाट पोस्ट ग्रेजुएट हुन् ।

उनीसँग टर्की, जिम्बाबे, श्रीलंका, मालद्विप्स र भारतलगायतका देशमा विपद् व्यवस्थापनमा काम गरेको अनुभव छ ।

• 

• 

• 

यसैगरी, परमाणु वैज्ञानिक डा. यादव पण्डित पनि कांग्रेसको प्रशिक्षण प्रतिष्ठानको सदस्यमा मनोनीत भएका छन् ।

उनी अमेरिकाको टेनिसीमा वाप्टिस स्वास्थ विज्ञान विश्वविद्यालयमा परमाणु वैज्ञानिकका रुपमा कार्यरत छन् ।

पण्डित उपसभापति शर्मा नेपाल विद्यार्थी संघ (नेविसंघ) को सभापति हुँदा महामन्त्री थिए ।

नेपाली चलचित्रका निर्देशक मीन भामलाई पनि कांग्रेसले प्रशिक्षण प्रतिष्ठानको सदस्य बनाएका छन् ।

उनले निर्देशन र निर्माण गरेका चलचित्र ‘कालो पोथी’ र ‘साम्बला’ ओस्कारमा पुगेका थिए ।

यस्तै कवि श्रवण मुकारुङ, मानवअधिकार अभियन्ता मोहना अन्सारी, नेपाली राष्ट्रिय क्रिकेट टिमका पूर्वकप्तान विनोद दास पनि प्रतिष्ठानमा सदस्य मनोनीत भएका छन् ।

प्रतिष्ठानमा डोलराज भुसाल र डा. कृष्णप्रसाद पौडेल दोहोरिएका छन् । उनीहरू निवर्तमान उपसभापति पूर्णबहादुर खड्का नेतृत्वको प्रतिष्ठानमा सदस्य थिए ।