सरकारसँग ६ बुँदे सहमति, ११ दिनको अनसन अन्त्य

काठमाडौँ । अनसनरत डा. निकोलस भुसाल र हरिश विष्टसँग सरकारबीच ६ बुँदे सहमति भएपछि उनीहरूको ११ दिन लामो अनसन अन्त्य भएको छ। शुक्रबार भएको सहमतिसँगै दुबै जनाले अनसन तोडेका हुन्।

सरकार र अनसनरत पक्षबीच भएको सहमतिपत्रमा डा. भुसाल, हरिश विष्ट र सरकारका तर्फबाट प्रधानमन्त्रीका मुख्य सल्लाहकार अजयभद्र खनालले हस्ताक्षर गरेका छन्। सहमति भएपछि प्रधानमन्त्री सुशीला कार्कीले बालुवाटारमा दुवैलाई जुस खुवाउँदै अनसन तोडाएकी थिइन्।

• 

डा. भुसाल र विष्टले विभिन्न माग राख्दै सरकारको ध्यानाकर्षण गराउन अनसन थालेका थिए। उनीहरूको मागमा जेन–जी आन्दोलनमा गोली चलाउनेमाथि कारबाही, आन्दोलनका क्रममा पक्राउ परेकाको रिहाइ, भ्रष्टाचारको छानबिन तथा दोषीमाथि कारबाही र विदेशमा रहेका नेपालीलाई मतदान अधिकार प्रदान गर्नुपर्ने विषय समेटिएको थियो।

सरकारसँग सहमति भएपछि उनीहरूले आफ्नो आन्दोलन स्थगित गरेका छन्। सहमति कार्यान्वयनका विषयमा सरकारले प्रतिबद्धता जनाएको बताइएको छ।