दाक्सु मिडिया
काठमाडौं — राष्ट्रिय स्वतन्त्र पार्टी (रास्वपा) को सचिवालयमा चार जना नयाँ सदस्य थपिएका छन्। नयाँ सदस्यहरूमा गणेश पराजुली, शिशिर खनाल, सोबिता गौतम र हरि ढकाल रहेका छन्।
यी चारै जना प्रत्यक्ष निर्वाचित सांसद हुन्। उनीहरूलाई रास्वपा सभापति रवि लामिछानेले मनोनीत गरेका हुन्। शनिबार बसेको सचिवालय बैठकमा लामिछानेले प्रस्ताव पेस गरेका थिए, जसलाई बैठकले अनुमोदन गरेको प्रवक्ता मनिष झाले जानकारी दिए।
पार्टीको विधानअनुसार सभापतिले पदाधिकारी मनोनीत गर्न सक्ने प्रावधान छ। विघटित प्रतिनिधिसभाका सबै प्रत्यक्ष निर्वाचित सांसदलाई सचिवालयमा ल्याउने सैद्धान्तिक सहमति अनुरूप यो प्रक्रिया अघि बढाइएको र बाँकी सांसदहरूलाई पनि क्रमशः सचिवालयमा थपिने रास्वपाका एक नेताले जानकारी दिए।
हाल रास्वपाको सचिवालयमा १३ सदस्य पुगेका छन्।
हालका सचिवालय सदस्यहरूमा निम्न व्यक्तिहरू छन्:
- सभापति रवि लामिछाने
- कार्यवाहक सभापति डिपी अर्याल
- उपसभापति स्वर्णिम वाग्ले
- महामन्त्री कविन्द्र बुर्लाकोटी
- सहमहामन्त्री विपिनकुमार आचार्य
- प्रवक्ता मनिष झा
- सदस्यहरू दीपक बोहरा, सन्तोष परियार, विराजभक्त श्रेष्ठ
- र हालै थपिएका गणेश पराजुली, शिशिर खनाल, सोबिता गौतम, हरि ढकाल
यस निर्णयसँगै पार्टीभित्रको निर्णय प्रक्रियामा प्रत्यक्ष निर्वाचित सांसदहरूको सहभागिता बढ्ने अपेक्षा गरिएको छ।
तपाईको प्रतिक्रिया दिनुहोस्