पहिरोमा पुरिँदा १५ जनाको मृत्यु, १८ जना उद्धार

काठमाडौं, आश्विन २२ – भारतको हिमाचल प्रदेशस्थित बिलासपुर जिल्लामा मंगलबार बिहान भएको एउटा भीषण पहिरोका कारण एक निजी बस दुर्घटनाग्रस्त हुँदा १५ जनाको मृत्यु भएको छ। घटनामा अन्य १८ जनालाई जीवितै उद्धार गरिएको छ, जसमध्ये तीन जनाको अवस्था गम्भीर रहेकोले अस्पताल पठाइएको छ।

हिमाचल प्रदेशका उपमुख्यमन्त्री मुकेश अग्निहोत्रीले घटनाबारे जानकारी दिँदै भने, “दुर्घटनाग्रस्त बसमा अनुमानित २५–३० जना सवार थिए। यकिन सङ्ख्या अझै पत्ता लागेको छैन। उद्धार कार्य जारी छ र म आफैँ घटनास्थलतर्फ जाँदैछु।”

• 

यस दुःखद घटनाप्रति मुख्यमन्त्री सुखविन्दर सिंहले गहिरो शोक व्यक्त गरेका छन्। उनले मृतकप्रति श्रद्धाञ्जली अर्पण गर्दै पीडित परिवारलाई समवेदना प्रकट गरेका छन्।

सरकारद्वारा घटनास्थलमा उद्धार टोली परिचालन गरिएको छ र पहिरोको जोखिम अझै कायमै रहेकाले स्थानीयलाई सतर्क रहन आग्रह गरिएको छ।