कार दुर्घटना: एक जनाको ज्यान गयो, तीन जना घाइते

सर्लाही । सर्लाही जिल्लाको ईश्वरपुर क्षेत्रमा पर्ने पूर्व–पश्चिम राजमार्गमा भएको सवारी दुर्घटनामा एक युवकको मृत्यु भएको छ भने तीन जना घाइते भएका छन्।

जिल्ला प्रहरी कार्यालय सर्लाहीका अनुसार बुधबार बिहान लु ३ च ५४७२ नम्बरको निजी कार दुर्घटनामा परेको हो। दुर्घटनामा बुटबल उपमहानगरपालिका–१ निवासी २७ वर्षीय शुभम् जैसवालको घटनास्थलमै मृत्यु भएको प्रहरीले जनाएको छ।

• 

• 

काँकरभिट्टाबाट बुटवलतर्फ जाँदै गरेको उक्त कारका चालक २३ वर्षीय साहिल बर्मा तथा यात्रुहरू ४८ वर्षीय वृजकिशोर बर्मा र ५२ वर्षीय सञ्जय जैसवाल घाइते भएका छन्। घाइते सबैलाई उपचारका लागि महोत्तरीको बर्दिबासस्थित शुभस्वस्तिक अस्पतालमा भर्ना गरिएको छ। प्रहरीका अनुसार घाइतेमध्ये सञ्जय जैसवालको अवस्था गम्भीर रहेको छ।