विश्वकपको फाइनलमा अर्जेन्टिना भर्सेस ब्राजिल भिडेको हेर्ने नेयमारको इच्छा

काठमाडौँ । क्लब फुटबलमा सबैभन्दा लोकप्रिय र रोमाञ्चक प्रतियोगिता भनेको निस्सन्देह युरोपेली च्याम्पियन्स लिग हो।

यदि यस प्रतियोगिताको फाइनलमा रियल मड्रिड र बार्सिलोना आमनेसामने भए त्यो दृश्य अत्यन्तै रोमाञ्चक हुने निश्चित छ। केही समर्थक भने बार्सिलोनाको सट्टा बायर्न म्युनिख वा म्यानचेस्टर सिटीजस्ता टोलीलाई पनि फाइनलमा देख्न चाहन सक्छन्।

• 

तर, यदि मञ्च विश्वकप हो भने कुन दुई देशबीच फाइनल हुन सक्छ भन्ने प्रश्न उठ्छ। धेरैजसो समर्थकको रोजाइमा ब्राजिल र अर्जेन्टिना नै हुने पक्का छ। यी दुई छिमेकी राष्ट्रबीचको फुटबल प्रतिस्पर्धा ऐतिहासिक रूपमा निकै चर्चित छ।

ब्राजिलका स्टार खेलाडी नेयमार पनि यही चाहना राख्छन् । साओ पाउलोमा भएको एक कार्यक्रममा उनले ब्राजिल–अर्जेन्टिना विश्वकप फाइनलमा भिडेको हेर्ने आफ्नो सपना भएको बताएका छन् ।

हालैका दिनमा चोट र फिटनेस समस्याका कारण नेयमार आफ्नो उत्कृष्ट फर्ममा छैनन्। त्यसैले विश्वकपमा उनको सहभागिता अनिश्चित देखिएको छ। सान्तोस क्लबमा फर्किए पनि उनी निरन्तर खेल्न सकेका छैनन्। तर पनि उनको लक्ष्य विश्वकप खेल्नु नै हो। यदि अन्ततः टोलीमा स्थान नपाए, त्यो ठूलो आश्चर्य हुनेछ।