विदेशको सपना देखाएर ३४ लाखभन्दा बढी असुली, चार जना पक्राउ

काठमाडौं । आकर्षक रोजगारीको प्रलोभन देखाउँदै विभिन्न मुलुक पठाउने भन्दै रकम असुलेको आरोपमा प्रहरीले चार जनालाई पक्राउ गरेको छ।

बेलायत, रोमानिया, अष्ट्रेलिया, क्यानडा र पोल्याण्ड पठाइदिने भन्दै उनीहरूले विभिन्न व्यक्तिबाट कुल रु ३४ लाख ८९ हजार लिएको उजुरी परेको प्रहरीले जनाएको छ।

• 

पक्राउ पर्नेमा वीरेन्द्र तामाङ, कमलप्रसाद गौतम, गणेशबहादुर बुढा र बद्रिकुमार तामाङ छन्। काठमाडौं उपत्यका अपराध अनुसन्धान कार्यालयको टोलीले उनीहरूलाई काठमाडौंका विभिन्न स्थानबाट पक्राउ गरेको हो।

प्रहरीले पक्राउ परेकालाई थप अनुसन्धानका लागि वैदेशिक रोजगार विभाग, ताहाचल पठाएको जनाएको छ।