नेशनल लाइफको कर्मचारी सीप अभिवृद्धि कार्यक्रम सम्पन्न

नेपालगञ्ज । नेशनल लाइफ इन्स्योरेन्स कम्पनी लिमिटेडले कर्मचारीको क्षमता, कार्यदक्षता तथा व्यावसायिक सीप अभिवृद्धि गर्ने उद्देश्यले नेपालगञ्जस्थित होटल सिद्धार्थमा चारदिने ‘एम्प्लोयी स्किल इन्हान्समेन्ट वर्कसप’ सम्पन्न गरेको छ ।

कम्पनीका अध्यक्ष श्रीमती प्रेमाराज्य लक्ष्मी सिंहको सभापतित्वमा सम्पन्न कार्यक्रममा प्रमुख कार्यकारी अधिकृत, व्यवस्थापन टोली, विभागीय प्रमुख तथा प्रशासनिक कर्मचारी गरी ३०० जनाभन्दा बढीको सहभागिता रहेको थियो ।

कार्यक्रमको समुद्घाटन अध्यक्ष श्रीमती प्रेमाराज्य लक्ष्मी सिंहले पानसमा दीप प्रज्वलन गरी गर्नुभएको थियो । समुद्घाटन समारोहमा मन्तव्य व्यक्त गर्दै अध्यक्ष सिंहले बदलिँदो परिवेशमा कर्मचारीलाई प्राविधिक रूपमा सक्षम बनाउन आर्टिफिसियल इन्टेलिजेन्स (एआई) लगायत डिजिटल कनेक्टिभिटीसम्बन्धी तालिमलाई प्राथमिकता दिने र कर्मचारीको क्षमता अभिवृद्धिमा कम्पनीले यथासक्य लगानी गर्ने बताउनुभयो ।

कर्मचारीको दक्षता तथा क्षमता अभिवृद्धिले कम्पनीको व्यवसाय प्रवर्द्धनमा समेत सकारात्मक योगदान पुग्ने उहाँको भनाइ थियो ।

सो अवसरमा कार्यसम्पादनका आधारमा ‘बेस्ट एम्प्लोयी अवार्ड–२०८३’ का लागि छनोट भएका कर्मचारीहरू शिवेश ठाकुर (इटहरी), गीता कुमारी थिङ (बर्दिबास), रुक्मणी कुमारी शर्मा (काठमाडौं), अनिल श्रेष्ठ (विराटनगर), सुवासमणि पोखरेल (नेपालगञ्ज), प्रमिला मल्ल (नेपालगञ्ज) र विष्णुजंग शाही (जाजरकोट) लाई अध्यक्ष सिंहले नगद पुरस्कारसहित सम्मानपत्र प्रदान गर्नुभएको थियो ।

कार्यक्रममा बेस्ट एम्प्लोयी अवार्ड प्राप्त गर्ने कर्मचारीहरूलाई अध्यक्ष सिंहले बधाई दिँदै अन्य कर्मचारीलाई पनि आगामी दिनमा उत्कृष्ट कार्यसम्पादनका लागि शुभकामना व्यक्त गर्नुभयो ।

कार्यक्रममा कम्पनीका प्रमुख कार्यकारी अधिकृत सुरेशप्रसाद खत्रीले सहभागीहरूलाई स्वागत गर्नुभएको थियो । स्वागत मन्तव्यका क्रममा उहाँले ग्राहक नै व्यवसायको मुख्य स्रोत भएको उल्लेख गर्दै ग्राहकलाई सरल, छिटो र सम्मानजनक सेवा प्रदान गर्नुपर्ने बताउनुभयो । संस्थाका नीति, नियमको पालना तथा कामप्रतिको जवाफदेहितालाई संस्थागत संस्कारका रूपमा विकास गर्नुपर्ने उहाँको भनाइ थियो ।

• 

‘समस्या जहाँ भए पनि त्यो संस्थाकै समस्या हो’ भन्ने भावनाका साथ समाधान खोज्ने जिम्मेवार प्रयासले कम्पनीप्रति ग्राहकको विश्वास अझ बलियो बनाउने उहाँले बताउनुभयो ।

सो अवसरमा कर्मचारीलाई विभिन्न विषयमा प्रशिक्षणसमेत प्रदान गरिएको थियो । नियामक निकाय नेपाल बीमा प्राधिकरणका निर्देशक शम्भुराज लामिछानेले बीमालाई माध्यम बनाएर विभिन्न बहानामा सम्पत्ति शुद्धीकरण हुन सक्ने भएकाले यसतर्फ सचेत रहनुपर्ने बताउनुभयो ।

त्यस्तै, अर्का प्रशिक्षक विश्वराज पौडेलले आर्टिफिसियल इन्टेलिजेन्सको प्रयोगसम्बन्धी प्रयोगात्मक प्रशिक्षण प्रदान गर्नुभएको थियो भने प्रशिक्षक संजोग कोइरालाले कर्मचारीको व्यवहार तथा आचरणले संस्थाको पहिचान निर्माणमा खेल्ने महत्वपूर्ण भूमिकाबारे प्रशिक्षण दिनुभएको थियो ।

कार्यक्रममा कर्मचारीहरूको सिर्जनात्मकता, नेतृत्व क्षमता, सहकार्य तथा कार्यसम्पादन अभिवृद्धिलाई लक्षित गरी अतिरिक्त क्रियाकलापसमेत समावेश गरिएको थियो । अतिरिक्त क्रियाकलापअन्तर्गत कम्पनीको सातै प्रदेशबाट सहभागी कर्मचारीहरूले दैनिक कार्यसम्पादनसँग सम्बन्धित विषयमा नाटक (ड्रामा) प्रस्तुत गरेका थिए ।

यसैगरी विभागीय प्रमुखहरूसँग प्यानल डिस्कसन तथा कर्मचारीबीच परीक्षा सञ्चालन गरिएको थियो । अन्तरकर्मचारी फुटसल, टेबल टेनिस र टग अफ वारलगायतका खेलकुद प्रतियोगितासमेत सञ्चालन गरिएको थियो । विजयी टिम तथा खेलाडीलाई कार्यक्रममा सम्मान तथा पुरस्कार प्रदान गरिएको थियो ।

यसैगरी कार्यक्रमको अन्तिम दिन कर्मचारीहरूलाई रिफ्रेसमेन्टका लागि कर्णाली चिसापानीको भ्रमणसमेत गराइएको थियो ।

चारदिने यस कार्यक्रमले कर्मचारीको प्राविधिक ज्ञान, व्यावसायिक दक्षता, नेतृत्व क्षमता, व्यवहार तथा संस्थागत कार्यसंस्कृतिको विकासमा योगदान पुर्‍याउने अपेक्षा गरिएको छ ।