माघे सङ्क्रान्तिले राष्ट्रिय एकता र सद्भाव बढाउने राष्ट्रपतिको विश्वास

काठमाडौँ । राष्ट्रपति रामचन्द्र पौडेलले माघे सङ्क्रान्ति र माघी जस्ता पर्वले नेपाली समाजमा आपसी सद्भाव, मेलमिलाप र राष्ट्रिय एकता मजबुत बनाउने विश्वास व्यक्त गरेका छन्।

माघे सङ्क्रान्ति तथा माघी पर्व २०८२ को अवसरमा शुभकामना सन्देश दिँदै उनले यस्ता पर्वले बहुजातीय र बहुसांस्कृतिक नेपाली समाजमा सहिष्णुता र बन्धुत्वको भावना बढाउने बताएका हुन्।

• 

• 

• 

राष्ट्रपति पौडेलका अनुसार माघे सङ्क्रान्ति विभिन्न समुदायले आ–आफ्नो परम्पराअनुसार मनाउने पर्व हो भने थारू समुदायले माघीलाई नयाँ वर्षका रूपमा मनाउँछन्। यस अवसरमा परम्परागत परिकार खाने, नदीमा स्नान गर्ने र पूजा–अर्चना गर्ने चलन रहिआएको छ।

उनले यस्ता मौलिक पर्वहरूले नेपाली संस्कृति संरक्षण गर्नुका साथै देशलाई विश्वसामु चिनाउन सहयोग पुर्‍याउने उल्लेख गर्दै समतामूलक र सुसंस्कृत समाज निर्माणमा प्रेरणा मिलोस् भन्ने कामना गरेका छन्।