इरानमा अमेरिकी दुई हमलामा युद्ध अपराधको पर्याप्त आधार छ : यूएन विशेषज्ञ

काठमाडौं । संयुक्त राष्ट्रसंघका मानवअधिकार विशेषज्ञहरूले इरानमा अमेरिकाले गरेका दुईवटा हमलामा युद्ध अपराध भएको पर्याप्त आधार रहेको बताएका छन्।

विशेषज्ञहरूले सार्वजनिक गरेको प्रतिवेदनअनुसार फेब्रुअरीमा मिनाबस्थित प्राथमिक विद्यालय र लामेर्दको खेलकुद परिसरमा भएका क्षेप्यास्त्र हमला अन्धाधुन्ध प्रकृतिका थिए। ती घटनामा कम्तीमा १७७ सर्वसाधारणको मृत्यु भएको र नागरिक पूर्वाधारमा क्षति पुगेको प्रतिवेदनमा उल्लेख छ।

अमेरिकाले लामेर्दमा हमला गरेको अस्वीकार गर्दै आएको छ भने मिनाब घटनाबारे अनुसन्धान भइरहेको बताएको थियो। अमेरिकी विदेश मन्त्रालयका एक अधिकारीले भने प्रतिवेदनका निष्कर्षलाई विश्वसनीय नमान्ने बताएका छन्।

• 

प्रतिवेदनमा जनवरीमा सरकारविरोधी प्रदर्शनका क्रममा इरानी सुरक्षा बलबाट व्यापक मानवअधिकार उल्लंघन भएको र सरकारका अधिकारीहरूले मानवताविरुद्धका अपराध गरेको निष्कर्षसमेत उल्लेख छ। विशेषज्ञहरूका अनुसार प्रदर्शनका क्रममा दशौँ हजार मानिस पक्राउ परेका थिए भने उनीहरूमध्ये धेरैले यातना, एकान्त कारावास र कानुनी परामर्शबाट वञ्चित हुनुपरेको थियो।

प्रदर्शनसँग सम्बन्धित आरोपमा कम्तीमा २९ पुरुषलाई शीघ्र सुनुवाइपछि मृत्युदण्ड दिइएको पनि प्रतिवेदनमा उल्लेख छ। यद्यपि, दमनका क्रममा मारिएका मानिसको वास्तविक संख्या स्वतन्त्र रूपमा पुष्टि गर्न नसकिएको विशेषज्ञहरूले बताएका छन्।

इरानले प्रतिवेदनका निष्कर्षबारे हालसम्म प्रतिक्रिया जनाएको छैन।