युक्रेनमा रुसको रातभरको भीषण आक्रमण, २२ जनाको मृत्यु

रुसले युक्रेनका विभिन्न सहरहरूमा गरेको रातभरको व्यापक हवाई आक्रमणमा कम्तीमा २२ जनाको मृत्यु भएको छ भने १३८ भन्दा बढी घाइते भएका छन्।

युक्रेनी अधिकारीहरूका अनुसार डिनिप्रोमा १६ र राजधानी किएभमा ६ जनाको मृत्यु भएको हो। सयौँ ड्रोन र दर्जनौँ क्षेप्यास्त्र प्रयोग गरिएको आक्रमणले आवासीय भवन, ऊर्जा संरचना र अन्य नागरिक पूर्वाधारमा ठूलो क्षति पुर्‍याएको छ।

युक्रेनी वायुसेनाले ७३ क्षेप्यास्त्र र ६५६ ड्रोन प्रहार गरिएको दाबी गर्दै अधिकांशलाई नष्ट गरिएको जनाएको छ। तर केही आक्रमण रोक्न नसकिँदा ठूलो मानवीय क्षति भएको हो।

• 

राजधानी किएभसहित डिनिप्रो, खार्किभ, पोल्टावा र जापोरिझिया क्षेत्रमा लगातार विस्फोटका आवाज सुनिएको थियो। उद्धार टोलीहरूले भग्नावशेषबाट बालबालिकासहितका शवहरू निकालिरहेका छन् भने धेरै क्षेत्रमा खोज तथा उद्धार कार्य जारी छ।

राष्ट्रपति भोलोदिमिर जेलेन्स्कीले अन्तर्राष्ट्रिय सहयोग बढाउन आग्रह गर्दै सुरक्षा कमजोर भए यस्ता आक्रमण दोहोरिन सक्ने चेतावनी दिएका छन्।

रुसले भने आक्रमणलाई सैन्य–औद्योगिक लक्ष्यमा केन्द्रित गरिएको दाबी गरेको छ, तर युक्रेनले नागरिक क्षेत्र बढी प्रभावित भएको बताएको छ।