सय दिन नपुग्दै सरकार जनविरोधी बाटोमा लागेको भन्दै माधव नेपालद्धारा आलोचना

काठमाडौँ । नेपाल कम्युनिस्ट पार्टी (नेकपा) का सहसंयोजक एवं पूर्वप्रधानमन्त्री माधवकुमार नेपालले वर्तमान सरकारले एकपछि अर्को जनविरोधी र मजदुरविरोधी काम गरिरहेको भन्दै कडा आलोचना गरेका छन् । १३७औँ अन्तर्राष्ट्रिय श्रमिक दिवसका अवसरमा शुक्रबार काठमाडौंमा आयोजित कार्यक्रमलाई सम्बोधन गर्दै उनले सरकार सय दिन पनि नपुग्दै गलत बाटोमा हिँड्न थालेको भन्दै नसच्चिए कडा सङ्घर्षमा उत्रिने चेतावनी दिएका हुन् ।

कार्यक्रममा बोल्दै नेता नेपालले सरकारले सुकुम्बासी, मजदुर, ट्रेड युनियन अधिकार, जनताको आवास र रोजगारीको अधिकारमाथि बेवास्ता गर्दै दमनको नीति लिएको आरोप लगाए । उनले सरकारका पछिल्ला कदमहरू जायज र उचित नभएको दाबी गर्दै यस्ता गलत कामको डटेर विरोध गर्न पार्टीसम्बद्ध मजदुर नेता तथा कार्यकर्तालाई निर्देशन दिए ।

• 

• 

• 

अहिले नै सरकारलाई निरन्तर आरोप लगाइरहने पक्षमा आफूहरू नरहेको र सुध्रिनका लागि मौका दिन चाहेको उनले स्पष्ट पारे । यद्यपि, जनतालाई पीडा र यातना दिने काम बन्द नगरे त्यसको अगुवाइ गर्दै मजदुर वर्ग सडक आन्दोलनमा उत्रिने उनको चेतावनी थियो ।